O alumnado de 3º e 4º ESO asistiu a unha amena charla do investigador do Instituto de Investigación Sanitaria de Galicia Sur, o neurocientífico Carlos Spuch, que lles falou, con palabras que entenderon ben, da saúde e a enfermidade mental na adolescencia, algo desgraciadamente habitual para o que non caben tabús nin ocultacións. Ás veces é inevitable, pero outras ten porta de entrada, como as drogas. Falar máis permite facer máis. Grazas a Carlos polo seu tempo.
Unha bonita imaxe de quimioluminiscencia: a reacción do luminol con lixivia (hipoclorito de sodio) e hidróxido de sodio para producir o ión aminoftalato excitado, que ao desexcitarse emite esta bonita luz azul (de 425 nm) que vemos na imaxe. Poesía líquida e pura química.
PROBLEMA 4 (para entregar o 22 de maio)
PROBLEMA 3 (para entregar o 15 de maio)
PROBLEMA 2 (para entregar o 8 de maio)
PROBLEMA 1 (para entregar o 4 de maio)
CONCURSO ARQUIMEDIANOS21 (10ª edición)
O alumnado de 3º e 4º ESO participou o venres 6 de febreiro na actividade Mulleres na ciencia, na aula de Naturnova, para coñecer, de preto, o labor dalgunhas pioneiras das distintas ramas da ciencia e, de paso, aprender un pouco da terra, da vida e do espazo.
Aquí tedes a parte do alumnado de 4º ESO despois de tentar obter ADN da saliva no laboratorio do colexio. Moito traballo para conseguir unhas pequenas febras brancas no medio dun líquido acuoso. Pero aí estaba: a base da vida na Terra.
O alumnado de 3º e 4º ESO asistiu a unha charla da tecnóloga dos alimentos Eva Covelo sobre a importancia do que comemos. O azucre, os mitos da alimentación ou como entender unha etiqueta foron algúns dos temas tratados. Xa, despois, nós decidimos, pero primeiro cómpre estar informados, non si?
Morre J. Watson, un dos descubridores, en 1953, da estrutura de dobre hélice do ADN. Este descubrimento, un fito na Bioloxía, foi publicado na revista Nature en abril dese ano e valeulle o Premio Nobel de Fisioloxía ou Medicina en 1962, xunto con F. Crick e M. Wilkins. As imaxes de difracción de raios X tomadas por Rosalind Franklin (xa falecida no ano de entrega do premio) foron fundamentais para este descubrimento, aínda que no seu momento a valía da investigadora non foi recoñecida.
O alumnado de 3º ESO observa un feixe de raios catódicos nunha recreación sinxela, no laboratorio, do experimento de Thomson (1897) que o levou ao descubrimento da primeira partícula elemental: o electrón. A desviación do feixe cara abaixo débese a que é unha partícula con carga negativa e interactúa co imán que atopa no seu camiño.
